kab khilega fir gulshan

 ruk gya hai sama saansein bhi hain madham

ruki si is tasveer mein yeh kaisa khalipan

zamin bhi hai aasman bhi hai failaa sa

roothe se lag rahe hain na koi apnapan

hare bhare pedon mein koi pakshi nazar na aaye

hairaani ho rahi hai are yeh kaisa beganapan

mere dil ki dhadkan bhi tham si gayi hai aaj

aaj na hai koi khushi aur na hai koi gham

door door tak yahan bhi nazar jaaye

shore mein bhi chuppi jaise ghut raha ho dum

koi apna nazar jo aaye bin dekhe nikal jaaye

aisa bhi kya hua hai aaj kyun yeh anjanapan

jiwan ki khuli kitaab mein koi prem rang nahi

yeh kaisa dhuaan utha hai kis baat ki hai jalan

kab pyaar ki hogi baarish dilon ki sookhi dharti par

khushiyon ka mausam aayega kab khilega fir gulshan

Teri Yaad

Teri yaad dil se bhulayein kaise?
ek aur dil ko thokar lagayein kaise?

Jab tak jinda hain mere armaan
tujhse door jaayein toh jaayein kaise?

Main meri ko khoob hawa de di
apni hasti ko ab mitaayein kaise?

Phoolon ke tarane gaate rahe
kaanton se daaman chhudaayein kaise?

Bachte rahe teri julaf ke jaal se
par tere saaye ko bhagayein kaise?

Dil ke tukron se tasalli na hui
khud ko sooli pe chadayein kaise?

Ab chup hai dil dard mein bhi
isko rulayein toh rulayein kaise?

Na chhero .......

Na chhero Jakhmon ko phoolon se

inse angaar barasane do

na dard ki koi dawa karo

jo riste hain toh risne do

Aaj na tum samjhao mujhko

aaj na mera gila karo

aaj jo aansoo baras rahe hain

mat roko unhein barsane do

Achha hi kiya kuchh bura nahi

jo mujhse door chala gya

tumhein paane ki tammana thi

ab dekhan ko tarsane do

Na mann ki hui na tann ki rahi

jindgi beecho beech fansi

na aa paaye na hi ja paye

atkati hai saans atkane do

mat chhero meri aankhon ko

inmein abhi chahat baaki hai

kabse pyaasi taras rahi hain

aa jao ab na tarsane do

aa jaao ab na tarsane do

Jab Sari Duniya Soti Hai

Jab saari duniya soti hai

Ek khidhi koi khulti hai

Yaadon ke jugnu aate hain

Aur ek mehfil si judti hai

Kuchh khatte meethe pal usmein

Angdaiyan fir lete hain

Kabhi khushi ki bearish hoti hai

Kabhi dard ki aandhi jhulti hai

Jis pal ne hansaya tha mujhko

Ab aansoo ban ke aaya hai

Is pal ke andhere mein

Uski hi nami si ghulti hai

Fir yaad kisi ki aayi hai

Fir aankh se aansoo tapka hai

Par dekh ke un do naino ko

Honthon pe hansi bhi khilti hai

Jab saari duniya soti hai

Ek khidhi koi khulti hai

Yaadon ke jugnu aate hain

Aur ek mehfil si judti hai

Yeh Kaisi Kashmkash

 

Yeh kaisi kashmkash hai

Yeh kaisi beqrari hai

Kyun rundha sa hai gala

Kyun sir pe ek katari hai

Kal jo baat thi khushi ki

Aaj kyun bani who bhari hai

Kahan jaaun jakar chhupun

Dil kyun bana bhekhari hai

Kuchh sunna, dekhna na chahoon

Kiske liye yeh duniya saari hai

Raat bhar bahaye the aansoo

Is mann ki sookhi fir kyaari hai

Na jaanu kaun si manzil hai meri

Kahan jaane ki fir taiyari hai

Yeh kaisi kashmkash hai

Yeh kaisi beqrari hai